ភ្នំពេញ៖ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក ញ៉ឹក វណ្ណារ៉ា បានលើកឡើងថា គ្រប់ជាតិសាសន៍ទាំងអស់ដែលរងគ្រោះនៅកម្ពុជាផ្តល់សេវាដល់ជនរងគ្រោះដែលរងគ្រោះដោយការជួញដូរមនុស្ស។

លោក ញ៉ឹក វណ្ណារ៉ា ថ្លែងដូចនេះក្នុងឱកាសទទួលជួបពិភាក្សាការងារជាមួយលោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា នារសៀលថ្ងៃទី៨ ខែវិច្ឆិកា ឆ្នាំ២០២៣ នៅទីស្តីការក្រសួងមហាផ្ទៃ។

ក្នុងឱកាសនោះ លោក ញ៉ឹក វណ្ណារ៉ា បានលើកឡើងដល់ឯកអគ្គរាជទូតអាមេរិកប្រចាំនៅកម្ពុជាថា កម្ពុជាបានផ្តល់សេវាដល់ជនរងគ្រោះ មិនថាជនបរទេស ឬកម្ពុជាទាំងអស់ដែលរងគ្រោះដោយការជួញដូរ នឹងត្រូវបានជួយសង្គ្រោះដោយផ្តល់សេវាឱ្យគ្រប់ជាតិសាសន៍ទាំងអស់ដែលរងគ្រោះនៅកម្ពុជា។

ជាមួយគ្នានេះ លោកក៏បានថ្លែងបន្ថែមថា រាជរដ្ឋាភិបាលកម្ពុជាបានយកចិត្តទុកដាក់ទៅលើការកំណត់អត្តសញ្ញាណកម្មជនរងគ្រោះដោយមានមណ្ឌលសំចតប៉ោយប៉ែត និងមណ្ឌលសំចតខេត្តដែលកំណត់ជាតំបន់។

ទន្ទឹមនោះដែល ភាគីពាក់ព័ន្ធបានធ្វើការកែសម្រួល និងធ្វើបច្ចុប្បន្នភាព ដើម្បីមានភាពងាយស្រួលនៅក្នុងការកំណត់អត្តសញ្ញាណកម្មជនរងគ្រោះទាំងអស់។

នាជំនួបខាងលើនេះ ក៏មានការចូលរួមពីក្រសួងពាក់ព័ន្ធផ្សេងទៀតក្នុងប្រតិបត្តិការដោះស្រាយបញ្ហាការជួញដូរមនុស្សនៅកម្ពុជាផងដែរ ដោយរដ្ឋមន្រ្តីក្រសួងកិច្ចការនារី លោកស្រី អ៊ឹង កន្ថាផាវី បានលើកឡើងថា បញ្ហាជួញដូរជាបញ្ហាដែលប្រទេសទាំងអស់ត្រូវរួមគ្នាទទួលខុសត្រូវដោះស្រាយ ទោះបីជាបទល្មើសមួយចំនួន ជាមធ្យោបាយថ្មី បង្កឡើងដោយឧក្រិដ្ឋជនក៏ដោយ ក៏រាជរដ្ឋាភិបាលកម្ពុជាបានខិតខំប្រឹងប្រែងរិះរកវិធានការ ដើម្បីបើកប្រតិបត្តិការស៊ើបអង្កេតស្រាវជ្រាវ និងបង្ក្រាបបទល្មើសនេះយ៉ាងសកម្ម ដោយបើកទូលាយឲ្យមានបណ្តាញរាយការណ៍ទាន់ហេតុការណ៍ និងបើកប្រតិបត្តិការបានរហូតដល់ទៅជាង ១ ០៦៧ករណី ក្នុងរយៈពេលតែ ១ឆ្នាំ ដើម្បីរុករក និងបំផ្លាញបណ្ដាញឧក្រិដ្ឋជន និងសង្គ្រោះជនរងគ្រោះឲ្យបានទាន់ពេលវេលា បើទោះបីជាករណី ទាំងនោះ មិនមែនជាករណីជួញដូរមនុស្ស ឬមានការផ្ដល់ព័ត៌មានមិនពិតក៏ដោយ។

លោកស្រីថ្លែងបន្តថា រាជរដ្ឋាភិបាលកម្ពុជា តែងបានអំពាវនាវដល់បណ្តា ប្រទេសដែលមានជាប់ពាក់ព័ន្ធ ទាំងជនល្មើស ទាំងជនរងគ្រោះឲ្យរួមសហការជាមួយកម្ពុជា ដើម្បីលុបបំបាត់អំពើជួញដូរមនុស្ស និងដោះស្រាយបញ្ហារួម គ្នា ឲ្យបានល្អប្រសើរ ព្រោះនេះជាបញ្ហារួម មិនមែនជាបញ្ហាដោយឡែក តែកម្ពុជានោះទេ៕